സിങ് വി ചെയ്തത് തെറ്റ്

കൊച്ചി

എന്‍ഡോസള്‍ഫാന്‍ കമ്പനി ഉടമകള്‍ക്കായി കോണ്‍ഗ്രസ് വക്താവ് അഭിഷേക് മനു സിങ് വി സുപ്രീംകോടതിയില്‍ ഹാജരായതു തെറ്റായി പോയെന്നു കെപിസിസി പ്രസിഡന്‍റ് രമേശ് ചെന്നിത്തല. സിങ് വി കോണ്‍ഗ്രസ് വക്താവാണെന്ന കാര്യം മറക്കുന്നു. അദ്ദേഹത്തിന്‍റെ ഭാഗത്തു നിന്ന് ഇത്തരം നടപടിയുണ്ടായതു വേദനാജനകമാണ്. സംഭവത്തിലെ പ്രതിഷേധം നേരിട്ടറിയിക്കുമെന്നു ചെന്നിത്തല പറഞ്ഞു.

എന്‍ഡോസള്‍ഫാന്‍ വിഷയത്തില്‍ സംസ്ഥാനത്തിന്‍റെ നിലപാടു വ്യക്തമാണ്. എന്‍ഡോസള്‍ഫാന്‍ പൂര്‍ണമായി നിരോധിക്കുകയാണു സര്‍ക്കാര്‍ ലക്ഷ്യം. ഇതിനെ മറികടന്നാണു സിങ് വി കോടതിയില്‍ ഹാജരായത്. അഭിഭാഷകന്‍ എന്ന നിലയില്‍ സിങ് വിക്കു കേസുകള്‍ ഏറ്റെടുക്കാം. ഉത്തരവാദിത്വപ്പെട്ട പദവിയില്‍ ഇരുന്നു കൊണ്ട് ഇതു ചെയ്യരുതെന്നു ചെന്നിത്തല ചൂണ്ടിക്കാട്ടി.

അതേസമയം സിങ് വിയെ വിമര്‍ശിച്ചു കൊണ്ടു കോണ്‍ഗ്രസ് നേതാവും എംഎല്‍എയുമായ വി.ഡി. സതീശന്‍ രംഗത്തെത്തി. അഭിഷേക് സിങ് വിയെ വക്താവു സ്ഥാനത്തു നിന്നു പുറത്താക്കണമെന്നു സതീശന്‍ ആവശ്യപ്പെട്ടു. പാര്‍ട്ടിയുടെ വികാരം അറിയാത്ത ആള്‍ വക്താവായി ഇരിക്കാന്‍ യോഗ്യനല്ലെന്നും സതീശന്‍ ചൂണ്ടിക്കാട്ടി.

സന്ദര്‍ശനം മനുഷ്യത്വപരം

തിരുവനന്തപുരം

സിപിഎം പുറത്താക്കിയ ബെര്‍ലിന്‍ കുഞ്ഞനന്തന്‍ നായരെ സന്ദര്‍ശിച്ചതിനു ന്യായീകരണവുമായ വി.എസ്. അച്യുതാന്ദന്‍ രംഗത്ത്. സന്ദര്‍ശനം മനുഷ്യത്വപരമാണെന്നു വിഎസ് പറഞ്ഞു. മരണം, വിവാഹം, അസുഖം എന്നീ കാര്യങ്ങളില്‍ മനുഷ്യത്വപരമായ പെരുമാറ്റത്തിനു തെറ്റില്ല. പുറത്താക്കിയവരോ അല്ലാത്തവരോ എന്ന വേര്‍തിരിവില്ലാതെ സഹകരിക്കുകയാണു പാര്‍ട്ടിയുടെ പതിവ്. എന്നാല്‍ ഇക്കാര്യങ്ങള്‍ പലരും മറച്ചുവയ്ക്കുന്നു.

സംസ്ഥാന സെക്രട്ടറി പിണറായി വിജയന്‍റെ മകളുടെ വിവാഹത്തില്‍ പാര്‍ട്ടി പുറത്താക്കിയ എം.വി. രാഘവനെ ക്ഷണിച്ചിരുന്നു. കൂത്തുപറമ്പില്‍ അഞ്ചുപേരെ വെടിവച്ചു കൊല്ലാന്‍ നേതൃത്വം നല്‍കിയ ആളാണ് എം.വി. രാഘവന്‍. താനും എം.എം ലോറന്‍സും എംവിആറിനൊപ്പം വിവാഹത്തില്‍ പങ്കെടുത്തു. ബിജെപി നേതാവ് സി.കെ. പത്മനാഭനും ക്ഷണമുണ്ടായിരുന്നു. അദ്ദേഹവും പങ്കെടുത്തു. പാര്‍ട്ടിയെ സംബന്ധിച്ച കാര്യങ്ങള്‍ പലരും പല തരത്തിലാണു വിലയിരുത്തിയതെന്ന് അദ്ദേഹം അറിയിച്ചു.

സ്വാശ്രയ മാനെജ്മെന്‍റുമായി ഒളിഞ്ഞും തെളിഞ്ഞും സംസ്ഥാന സര്‍ക്കാര്‍ കരാറിലേര്‍പ്പെട്ടെന്നു പ്രതിപക്ഷ നേതാവ് പറഞ്ഞു. ഇക്കാര്യം കടുത്ത പ്രതിഷേധമുണ്ടെന്നും അദ്ദേഹം പറഞ്ഞു.

ഓഹരി വിപണിയില്‍ വന്‍ ഇടിവ്

മുംബൈ
സെന്‍സെക്സ് അറുനൂറ് പോയിന്‍റും നിഫ്റ്റി ഇരുനൂറ് പോയിന്‍റും താഴ്ന്നു. 13 മാസത്തെ ഏറ്റവും വലിയ ഇടിവാണ് ഇന്ത്യന്‍ ഓഹരി വിപണിയില്‍ ഉണ്ടായിരിക്കുന്നത്. സെന്‍സെക്സ് 619.49 പോയിന്‍റ് ഇടിഞ്ഞു 17,073.69 ലാണു വ്യാപാരം നടക്കുന്നത്. യുഎസ്, എഷ്യന്‍ വിപണികളിലുണ്ടായ ഇടിവാണ് ഇന്ത്യന്‍ ഓഹരി വിപണിയെയും ബാധിച്ചത്. ഡൗ ജോണ്‍സ് 500 പോയിന്‍റ് നഷ്ടത്തിലാണ് ഇന്നു വ്യാപാരം അവസാനിപ്പിച്ചത്. ആഗോള സാമ്പത്തിക പ്രതിസന്ധിയെക്കുറിച്ചുള്ള ആശങ്കകള്‍ ശക്തമായതോടെ നിക്ഷേപകര്‍ പിന്‍മാറുന്നതാണു വിപണികളില്‍ ഇടിവ് ഉണ്ടാകാന്‍ കാരണം. യൂറോപ്യന്‍ രാജ്യങ്ങളിലെ കടപ്രതിസന്ധി നിയന്ത്രണ വിധേയമാക്കാന്‍ സാധിക്കാത്തതും തിരിച്ചടിയായി. കടം തിരിച്ചടവ് വീഴ്ച ഒഴിവാക്കാന്‍ യുഎസ് നടത്തിയ നിയമ നിര്‍മാണം രാജ്യത്തെ ആഭ്യന്തര നിക്ഷേപത്തെ ഗുരുതരമായി ബാധിക്കുമെന്ന വിലയിരുത്തലും തിരിച്ചടിയായി. യൂറോപ്യന്‍ രാജ്യങ്ങളിലെയും യുഎസിലെയും ഫാക്റ്ററി ഉത്പാദനത്തില്‍ ഉണ്ടായ കുറവും നിക്ഷേപകരെ ആശങ്കയിലാക്കി. ആഗോള വിപണികളില്‍ മൂന്നു മുതല്‍ അഞ്ചു ശതമാനം വരെ ഇടിവ് ഉണ്ടായി. 

IT വ്യവസായം ഗ്രാമങ്ങളിലേക്കും

തിരുവനന്തപുരം


ഗ്രാമപ്രദേശങ്ങളില്‍ ഐടി അധിഷ്ഠിത തൊഴില്‍ ലഭ്യത വര്‍ധിപ്പിക്കുന്നതിനുള്ള നിര്‍ദേശങ്ങള്‍ അടങ്ങിയ ഐടി കരട് നയം പ്രഖ്യാപിച്ചു. പ്രധാന നഗരങ്ങള്‍ക്കു പുറത്തു മുന്‍ സര്‍ക്കാര്‍ തുടങ്ങിയ ഐടി പാര്‍ക്കുകളും ടെക്നോലോഡ്ജുകളും വിജയം കണ്ടില്ല. യാത്രാ സംവിധാനങ്ങള്‍ പോലും സൃഷ്ടിക്കാതെ തുടങ്ങിയ പദ്ധതികള്‍ സാമ്പത്തിക നഷ്ടം വരുത്തി. ഈ വിലയിരുത്തലിന്‍റെ അടിസ്ഥാനത്തിലാണു ഗ്രാമ പ്രദേശങ്ങളില്‍ ഐടി അധിഷ്ഠിത തൊഴില്‍ സംരംഭങ്ങള്‍ക്കു പുതിയ വഴി സര്‍ക്കാര്‍ തേടുന്നത്.

സംസ്ഥാനത്തിനകത്തും പുറത്തും പ്രവര്‍ത്തിക്കുന്ന ഐടി കമ്പനികളുടെ ബിപിഒ (ബിസിനസ് പ്രോസസ് ഔട്ട് സോഴ്സിങ് ) കള്‍ ഗ്രാമ പ്രദേശങ്ങളില്‍ തുടങ്ങുന്നതിനാണു പദ്ധതി. വന്‍കിട കമ്പനികളുടെ പ്രവൃത്തികള്‍ ഔട്ട് സോഴ്സ് ചെയ്താണ് ബിപിഒകള്‍ ആരംഭിക്കുന്നത്.

20 മുതല്‍ 50 പേര്‍ക്കു വരെ നേരിട്ടു തൊഴില്‍ നല്‍കാന്‍ ഇതിലൂടെ കഴിയും. ഇതിനു പുറമെ ഗ്രാമങ്ങളില്‍നിന്നു നഗരങ്ങളിലെ പാര്‍ക്കുകളില്‍ തൊഴിലെടുക്കാനെത്തുന്നവര്‍ക്കു സ്വന്തം സ്ഥലങ്ങളില്‍ തൊഴില്‍ ലഭ്യത ഉറപ്പ് വരുത്തും. ബിപിഒയ്ക്കായി പ്രധാനപ്പെട്ട ഐടി സ്ഥാപനങ്ങള്‍ മുന്നോട്ടുവന്നിട്ടുണ്ട്. ആദ്യഘട്ടത്തില്‍ സര്‍ക്കാര്‍ സഹായത്തോടെയാകും ബിപിഒകള്‍ ആരംഭിക്കുക. തുടര്‍ന്നു സ്വമേധയാ മുന്നോട്ടു വരുന്നവര്‍ക്ക് ആവശ്യമായ അടിസ്ഥാന സൗകര്യങ്ങളും സാങ്കേതിക സഹായങ്ങളും ഒരുക്കും. പുതുക്കിയ ഐടി നയത്തില്‍ ഇതിന് നിര്‍ദേശങ്ങള്‍ വ്യക്തമാക്കിയിട്ടുണ്ട്.

ഒപ്റ്റിക്കല്‍ ഫൈബര്‍ കണക്റ്റിവിറ്റിയും ബ്രോഡ്ബാന്‍ഡ് സംവിധാനങ്ങളും ഗ്രാമപ്രദേശങ്ങളില്‍ വിപുലമാക്കും. ഇ - ഗവേണ്‍സ് പദ്ധതി വൈവിധ്യവത്കരിച്ചു വിപുലപ്പെടുത്തും. കുറഞ്ഞ ചെലവില്‍ ഐടി സൗകര്യങ്ങള്‍ ലഭ്യമാക്കാന്‍ സര്‍ക്കാര്‍ മുന്‍കൈയെടുക്കും. സുതാര്യമായി നടപടികള്‍ മുന്നോട്ടു കൊണ്ടുപോകുന്നതിനു സംവിധാനങ്ങള്‍ ഏര്‍പ്പെടുത്തും. സേവന മേഖലയില്‍ ഐടി അധിഷ്ഠിത പദ്ധതികള്‍ സ്ഥാപിക്കും. ഐടി ഫിനിഷിങ് സ്കൂളുകളില്‍ ഏകീകൃത സിലബസ് ഏര്‍പ്പെടുത്തും. ഇ സാക്ഷരത സമ്പൂര്‍ണമാക്കുന്നതിനുള്ള നടപടികള്‍ സ്വീകരിക്കും. യോഗ്യതയുള്ള കമ്പനികള്‍ പ്രവര്‍ത്തിക്കുന്ന സ്ഥലങ്ങളില്‍ പ്രത്യേക സാമ്പത്തിക മേഖലാ പദവി ലഭ്യമാക്കുന്നതിനുള്ള നടപടികള്‍ സ്വീകരിക്കും. മുതല്‍മുടക്കിനു സബ്സിഡി നല്‍കുന്നതിനുള്ള നിര്‍ദേശങ്ങളും കരട് നയത്തില്‍ ഉള്‍പ്പെടുത്തിയിട്ടുണ്ട്.

സര്‍ക്കാര്‍ ഐടി പാര്‍ക്കുകളില്‍ കെട്ടിട, ഭൂമി രജിസ്ട്രേഷനുകള്‍ക്കു മറ്റും സ്റ്റാംപ് ഡ്യൂട്ടി ഒഴിവാക്കും. രജിസ്ട്രേഷന്‍ ഫീസിലും ഇളവ് നല്‍കും. വൈദ്യുതി നിരക്കില്‍ സൗജന്യം നല്‍കും. സ്വകാര്യ ഐടി പാര്‍ക്കുകള്‍ക്കും സൗജന്യങ്ങള്‍ നല്‍കും. അടുത്ത വര്‍ഷങ്ങളില്‍ ഐടി രംഗത്ത് മികച്ച നിക്ഷേപങ്ങള്‍ എത്തിക്കുന്നതിനുള്ള പ്രവര്‍ത്തനങ്ങള്‍ സര്‍ക്കാരിന്‍റെ ഭാഗത്തുനിന്നുണ്ടാകും. വിദേശത്തും സ്വദേശത്തും പ്രവര്‍ത്തിക്കുന്ന കമ്പനികള്‍ക്കു കേരളം നിക്ഷേപത്തിനിണങ്ങിയ സംസ്ഥാനമാണെന്ന വസ്തുത ബോധ്യമാക്കുന്നതിനുള്ള നടപടികളും സ്വീകരിക്കുമെന്നു കരട് ഐടി നയത്തില്‍ വ്യക്തമാക്കുന്നു.

സച്ചിന് റേസിങ് ടീം

മുംബൈ

ക്രിക്കറ്റ് താരങ്ങളായ സച്ചിന്‍ ടെണ്ടുല്‍ക്കറും യുവരാജ് സിങ്ങും റേസിങ് ടീം ഫ്രാഞ്ചൈസി സ്വന്തമാക്കും. അഞ്ചു മില്യണ്‍ ഡോളര്‍ വീതം മുടക്കിയാണ് ഇരുവരും ഫ്രാഞ്ചൈസി സ്വന്തമാക്കുന്നത്. ഡിസംബര്‍ 18നു നടക്കുന്ന ഐ 1 സൂപ്പര്‍ സീരിസില്‍ ഇരുവരുടെയും ടീമുകള്‍ മത്സരിക്കും. ടീം ഉടമകളെ വരുന്ന ആഴ്ച പ്രഖ്യാപിക്കും. ലേലത്തിലൂടെയല്ല ടീമിനെ സ്വന്തമാക്കുകയെന്നു പ്രൊമോട്ടര്‍ അറിയിച്ചു.

രണ്ടു കാറുകള്‍ വീതമുള്ള ഒന്‍പതു ടീമുകളാണുള്ളത്. ഏഴ് ആഴ്ചയ്ക്കിടെ 14 മത്സരങ്ങള്‍ നടക്കും. ഏഴ് ഏഷ്യന്‍ സിറ്റികളിലാകും മത്സരം. ചെന്നൈ (ഇന്ത്യ), അബുദാബി, ദോഹ, ദുബായി (അറേബ്യന്‍ മേഖല), ക്വാലലംപുര്‍ (മലേഷ്യ), പാട്യ (തായ് ലന്‍ഡ്) എന്നിവടങ്ങളിലാണു മത്സരം.

ക്രിക്കറ്റ്, ബോളിവുഡ് താരങ്ങള്‍, വന്‍കിട വ്യവസായികള്‍ എന്നിവര്‍ക്കു റേസിങ് ടീം സ്വന്തമാക്കാന്‍ താത്പര്യമുണ്ടെന്നു മച്ച്ദാര്‍ മോട്ടോര്‍സ്പോര്‍ട്സ് സിഇഒ എം. ദര്‍ശന്‍ പറഞ്ഞു. ഇന്ത്യന്‍ നഗരങ്ങള്‍ ആസ്ഥാനമാക്കിയുള്ള ഒന്‍പതു ടീമുകളുടെ ഫ്രാഞ്ചൈസി സ്വന്തമാക്കാനാണ് ഇവര്‍ക്കു താത്പര്യമെന്ന് അദ്ദേഹം അറിയിച്ചു.

ഫോര്‍മുല വണ്‍ റേസിങ്ങിന്‍റെ ആരാധകനും ഫെരാരി കാര്‍ ഉടമയുമാണു സച്ചിന്‍.

വക്താവും അഭിഭാഷകനും രണ്ട്

ന്യൂഡല്‍ഹി
പാര്‍ട്ടി വക്താവും അഭിഭാഷകനും രണ്ടാണെന്നു പി.സി. ചാക്കോ എംപി. വക്താവായി പറയുന്ന കാര്യത്തിനു മാത്രമെ പാര്‍ട്ടിക്ക് ഉത്തരവാദിത്വമുള്ളൂ. അഭിഭാഷകനായി പറയുന്ന കാര്യം നേരിട്ടു ചോദിക്കണമെന്നും അദ്ദേഹം പറഞ്ഞു.

എന്‍ഡോസള്‍ഫാന്‍ കമ്പനിക്കു വേണ്ടി മനു അഭിഷേക് സിങ് വി ഹാജരായതിനെക്കുറിച്ചു ചോദിച്ചപ്പോഴായിരുന്നു ചാക്കോയുടെ മറുപടി.

ഇളവുകളെല്ലാം അതിസമ്പന്നര്‍ക്ക്

ഇതു സബ്സിഡി വിരോധത്തിന്‍റെ കാലഘട്ടം. ജനങ്ങള്‍ക്കുള്ള സര്‍ക്കാര്‍ ഇളവുകള്‍ ഒഴിവാക്കുന്നതു പരിഷ്കാര കേമത്തമായി വാഴ്ത്തുന്നവരുടെ ലോകം. ഇന്ധന, ഭക്ഷ്യ, വളം സബ്സിഡികള്‍ വെട്ടിക്കുറയ്ക്കണമെന്നും അങ്ങനെ ധനക്കമ്മി കുറയ്ക്കണമെന്നും സര്‍ക്കാരിനെ ഉപദേശിക്കുന്നവര്‍ക്കു പഞ്ഞമില്ല. ഇവയ്ക്കൊക്കെ ഒറ്റയടിക്ക് എടുത്താല്‍ പൊങ്ങാത്ത വിലയായാല്‍ അധികാരത്തിനു പുറത്താവുമെന്ന ഭീതി കേന്ദ്രം ഭരിക്കുന്നവര്‍ക്ക് ഇല്ലായിരുന്നെങ്കില്‍ എന്നേ നടപ്പായേനേ സബ്സിഡിരഹിത ഇന്ത്യ.

ആറു ലക്ഷത്തിലധികം രൂപ വാര്‍ഷിക വരുമാനമുള്ളവര്‍ക്ക് സബ്സിഡി നിരക്കില്‍ പാചകവാതകം നല്‍കരുതെന്നാണ് പാര്‍ലമെന്‍ററി പാനലിന്‍റെ ശുപാര്‍ശ. സബ്സിഡി നിരക്കില്‍ 395 രൂപ വിലയുള്ള എല്‍പിജി സിലിണ്ടര്‍ 642 രൂപ നല്‍കി ആറുലക്ഷക്കാര്‍ വാങ്ങട്ടെ. ഓരോ വീടിനും സബ്സിഡി നിരക്കില്‍ വര്‍ഷം നാലു സിലിണ്ടര്‍ നല്‍കിയാല്‍ മതി എന്നു നേരത്തേ നിര്‍ദേശം ഉയര്‍ന്നിരുന്നു. ആദായ നികുതി അടയ്ക്കുന്നവര്‍ക്കു സബ്സിഡി പരിമിതപ്പെടുത്തുന്നതിനെക്കുറിച്ചും പറഞ്ഞു കേട്ടിരുന്നു. ഏതു തലത്തിലൊക്കെയാണ് എല്‍പിജി സബ്സിഡി ഇല്ലാതാവുകയെന്ന് കണ്ടറിയേണ്ട അവസ്ഥ.

അതിനൊപ്പം ഇതാ പുതിയൊരു നിര്‍ദേശം കൂടി വെളിപ്പെടുത്തിയിരിക്കുന്നു സര്‍ക്കാര്‍. സ്വകാര്യ കാര്‍ ഉടമകള്‍ക്കു ഡീസല്‍ സബ്സിഡി ഒഴിവാക്കിയേക്കുമത്രേ. ഒരു ലിറ്റര്‍ ഡീസലിന് 6.08 രൂപ സബ്സിഡി നല്‍കുന്നുണ്ട് സര്‍ക്കാര്‍. രാജ്യത്തെ ഡീസല്‍ ഉപയോഗത്തിന്‍റെ 15 ശതമാനത്തോളവും സ്വകാര്യ ഡീസല്‍ കാറുകളുടേത്. സര്‍ക്കാര്‍ മോഹം നടപ്പായാല്‍ വന്‍ ഭാരമാണു പൊതു ഖജനാവിനൊഴിയുക. ആറു ലക്ഷം രൂപ വാര്‍ഷിക വരുമാനമുള്ളവരെപ്പോലെ സമ്പന്നരാണ് ഡീസല്‍ കാര്‍ ഉള്ളവരും എന്നാവുമല്ലോ സര്‍ക്കാരിന്‍റെ കണക്കുകൂട്ടല്‍.

ആറു ലക്ഷം രൂപ വാര്‍ഷിക വരുമാനമുള്ള കുടുബം ഇന്നു സമ്പന്നരുടെ ഗണത്തില്‍ വരുമോ? അതില്ലാത്ത ജനങ്ങള്‍ കോടിക്കണക്കിനുണ്ടെന്നും രണ്ടറ്റവും കൂട്ടിമുട്ടിക്കാന്‍ അവര്‍ പെടാപ്പാടു പെടുന്നു എന്നുമുള്ള വസ്തുത വിസ്മരിക്കാതെ തന്നെ പരിശോധിക്കേണ്ടതാണ്. പ്രതിമാസം അമ്പതിനായിരം രൂപ വരുമാനമുള്ള വന്‍ നഗരങ്ങളിലെ കുടുംബങ്ങള്‍ക്ക് എന്തുണ്ടാവും ഇന്നത്തെ ജീവിതനിലവാരം വച്ച് മെച്ചം വയ്ക്കാന്‍? ഉപ്പുതൊട്ടു കര്‍പ്പൂരം വരെ കഴുത്തറപ്പന്‍ വില നല്‍കി വാങ്ങേണ്ടവര്‍, വീട്ടുവാടകയ്ക്കും വാഹന ഇന്ധനത്തിനും ആരോഗ്യ പരിപാലനത്തിനും ഓരോ മാസവും നല്ലൊരു തുക നീക്കിവയ്ക്കേണ്ടവര്‍, പലിശയേറിയേറി ബാങ്കുകളുടെ പ്രതിമാസത്തവണകള്‍ കുന്നുപോലെ വളരുന്നവര്‍...ഇത്തരം ഇടത്തരക്കാരെയാണോ ടാറ്റയ്ക്കും ബിര്‍ളയ്ക്കും അംബാനിമാര്‍ക്കുമെല്ലാമൊപ്പം സര്‍ക്കാര്‍ ലിസ്റ്റിടുന്നത്...!

അതിവേഗം തഴച്ചുവളരുകയാണ് ഇന്ത്യന്‍ വാഹന വിപണി. ഒരു കാര്‍ കണ്ടാല്‍ ചുറ്റും കുട്ടികള്‍ ഓടിക്കൂടുന്ന കാലമൊക്കെ എന്നേ പോയ്മറഞ്ഞു. ഏത് ഇടത്തരക്കാരനും പ്രാപ്യമാണിന്നു കാറുകള്‍, പുതിയതല്ലെങ്കില്‍ യൂസ്ഡ്. യുസ്ഡ് കാര്‍ വിപണിയില്‍ കടുത്ത മത്സരം തന്നെയുണ്ടിന്ന്. യാത്രാപ്രശ്നങ്ങളില്‍ നിത്യവും നട്ടം തിരിയുന്നവന്‍ അങ്ങനെയൊരു കാര്‍ വല്ല വിധേനെയും തരപ്പെടുത്തിയാല്‍ അവന്‍ സമ്പന്നനായോ? അവനുള്ള ഡീസലിന് അധികവില നല്‍കണമെന്നു പറയുന്നതില്‍ എന്തു ന്യായം? ആധുനിക നഗരങ്ങളിലെ സാധാരണക്കാരനും ഇടത്തരക്കാരനും എവിടെ, എങ്ങനെ എന്നു കാണാത്തവരും അറിയാത്തവരുമാണോ പട്ടികകള്‍ തയാറാക്കുന്നത്.

ഇനി ഇവരൊക്കെ അതിസമ്പന്നര്‍ എന്നു തന്നെ കരുതുക. അത്യാഡംബര വാഹനങ്ങള്‍ ഉപയോഗിക്കുന്നവര്‍ എന്നും നിര്‍വചിക്കുക. അങ്ങനെയായാലും ഈ വേര്‍തിരിവിനു പ്രസക്തിയുണ്ടോ. ആറു ലക്ഷം രൂപ വാര്‍ഷിക വരുമാനമുള്ളവര്‍ വര്‍ഷം നാല്‍പ്പതിനായിരം രൂപയിലേറെ ആദായ നികുതി നല്‍കുന്നു. ഒരു ലക്ഷം രൂപയുടെ നികുതിയിളവ് നിക്ഷേപങ്ങളും മറ്റ് നികുതി ആനുകൂല്യങ്ങളും ഉപയോഗിച്ചാലും ആയിരക്കണക്കിനു രൂപ സര്‍ക്കാര്‍ ഖജനാവിനു നല്‍കുന്നുണ്ട് അവര്‍. വരുമാനം കൂടുന്നതിനനുസരിച്ച് നികുതിയും കൂടുന്നു. വാഹനങ്ങള്‍ വാങ്ങുമ്പോഴും അത് ഓടിക്കുമ്പോഴുമെല്ലാം നല്‍കുന്നുണ്ട് നികുതി. അതിനു ശേഷവും ഈ വേര്‍തിരിവ് വേണോ. നികുതിദായകനായത് സര്‍ക്കാര്‍ പരിഗണന ലഭിക്കാതിരിക്കാനുള്ള മാനദണ്ഡമാവുന്നത് അനീതിയല്ലേ.

സ്വകാര്യ കാറുകള്‍ക്ക് ഒരു വിലയും മറ്റു വാഹനങ്ങള്‍ക്കു മറ്റൊരു വിലയും എന്ന നയം പെട്രോള്‍ പമ്പുകളില്‍ എങ്ങനെ പ്രായോഗികമായി നടപ്പാക്കും എന്നതും ആലോചിക്കേണ്ട വിഷയം. കരിഞ്ചന്ത വര്‍ധിപ്പിക്കാനും ഉതകും ഇങ്ങനെയൊരു തീരുമാനം നടപ്പായാല്‍. പെട്രോള്‍ വില നിയന്ത്രണം ഉപേക്ഷിച്ച ശേഷം ഡീസല്‍ കാറുകള്‍ക്കു ഡിമാന്‍ഡ് കൂടുന്നു എന്നതു ശരി. മൊത്തം കാര്‍ വില്‍പ്പനയില്‍ മുപ്പതു ശതമാനത്തോളം ഡീസല്‍ കാറുകളായിട്ടുണ്ടെന്നും റിപ്പോര്‍ട്ടുകളുണ്ട്. ഏതെങ്കിലും തരത്തില്‍ ലാഭം നോക്കുന്നവരെ വിടാതെ പിടികൂടുകയാണു ലക്ഷ്യമെന്നു വരുന്നതു ഭൂഷണമല്ല ഒരു സര്‍ക്കാരിനും.

ജനങ്ങളുടെ സബ്സിഡിക്കു പിന്നാലെ പോകാതെ വന്‍ കോര്‍പ്പറേറ്റുകള്‍ക്കു നല്‍കുന്ന ഇളവുകള്‍ വെട്ടിക്കുറയ്ക്കട്ടെ. പ്രമുഖ ഐടി കമ്പനികള്‍ക്കു തന്നെ ബഹുകോടിക്കണക്കിനു രൂപയുടെ ഇളവുകള്‍ നല്‍കുന്നുണ്ട് സര്‍ക്കാര്‍. പൊതുഖജനാവിനു ലഭിക്കേണ്ട സഹസ്ര കോടികള്‍ ഉന്നതതലങ്ങളില്‍ അറിഞ്ഞ് നല്‍കാതിരിക്കുന്നുണ്ട് വന്‍കിട കോര്‍പ്പറേറ്റുകള്‍. റിലയന്‍സിന് ഇളവു നല്‍കിയെന്ന കുറ്റത്തിനാണ് മുരളി ദേവ്റ കേന്ദ്ര മന്ത്രിസഭയില്‍നിന്നു പുറത്താക്കപ്പെട്ടത്. അതേ “സേവന’ത്തിനു പാരിതോഷികമാണ് ദേവ്റയുടെ മകനു സിദ്ധിച്ച കേന്ദ്ര മന്ത്രിസഭാ പ്രവേശം. വമ്പന്‍മാര്‍ക്കുള്ള ഇളവുകള്‍ക്ക് യാതൊരു നിയന്ത്രണവും കൊണ്ടുവരാന്‍ താത്പര്യമോ മനക്കരുത്തോ കാണിക്കുന്നില്ല. ജനങ്ങളുടെ ചുമലില്‍ ഭാരം കയറ്റുന്നതാണ് എളുപ്പം.

പെട്രോളിന്‍റേതു പോലെ ഡീസല്‍, എല്‍പിജി വില നിയന്ത്രണവും ഉപേക്ഷിക്കാന്‍ എണ്ണക്കമ്പനികള്‍ സര്‍ക്കാരില്‍ തുടരെ സമ്മര്‍ദം ചെലുത്തുന്നുണ്ട്. വൈകാതെ ആ ലക്ഷ്യത്തിലേക്ക് എത്താമെന്ന പ്രതീക്ഷയും കാണും കമ്പനികള്‍ക്ക്. അതോടെ ആഗോള വിപണി വിലയ്ക്ക് അനുസൃതമായി ഇവിടെയും വില നിശ്ചയിക്കപ്പെടും. ഇപ്പോള്‍ പെട്രോളിനു കാണുന്നതുപോലെ ഇടക്കിടെ വില വര്‍ധിച്ചുകൊണ്ടിരിക്കും. അതുവരെയേയുള്ളൂ ഇന്ധനക്കാര്യത്തില്‍ സമ്പന്നരും പാവങ്ങളുമെന്ന തരംതിരിവു പോലും. ഇളവുകളില്ലാത്ത ലോകത്തേക്ക് മുണ്ടുമുറുക്കിയുടുത്തു നടന്നുകയറുക തന്നെ.

ലോര്‍ഡ്സില്‍ ഇന്ത്യ തറപറ്റി

ലണ്ടന്‍

ഇംഗ്ലണ്ടിനെതിരേ ഒന്നാം ക്രിക്കറ്റ് ടെസ്റ്റില്‍ ഇന്ത്യയ്ക്ക് 196 റണ്‍സിന്‍റെ കനത്ത തോല്‍വി. ലോക റാങ്കിങ്ങിലെ ഒന്നാം നമ്പര്‍ ടെസ്റ്റ് ടീം ഇതു തന്നെയോ എന്നു സഹതപിക്കേണ്ട അവസ്ഥയിലേക്ക് കൂപ്പുകുത്തിയ ഇന്ത്യയ്ക്കെതിരേയുള്ള ജയത്തോടെ നാല് മത്സരങ്ങളുടെ പരമ്പരയില്‍ ഇംഗ്ലണ്ട് 1-0ത്തിനു മുന്നില്‍. ഇംഗ്ലണ്ട് ഒന്നാം ഇന്നിങ്സില്‍ എട്ട് വിക്കറ്റ് നഷ്ടത്തില്‍ 474 റണ്‍സും രണ്ടാം ഇന്നിങ്സില്‍ ആറ് വിക്കറ്റ് നഷ്ടത്തില്‍ 269 റണ്‍സും സ്വന്തമാക്കി. ഇന്ത്യയാകട്ടെ ഒന്നാം ഇന്നിങ്സില്‍ 286 റണ്‍സിനും രണ്ടാം ഇന്നിങ്സില്‍ 261 റണ്‍സിനും ഓള്‍ ഔട്ട്.

ഒന്നാം ഇന്നിങ്സില്‍ ഡബിള്‍ സെഞ്ചുറി നേടിയ കെവിന്‍ പീറ്റേഴ്സണും (202) രണ്ടാം ഇന്നിങ്സില്‍ സെഞ്ചുറി നേടിയ മാറ്റ് പ്രയറും (103) ഇംഗ്ലണ്ടിനായി ബാറ്റിങ്ങിലും, രണ്ടിന്നിങ്സിലുമായി ഏഴ് വിക്കറ്റ് വീതം വീഴ്ത്തിയ ജെയിംസ് ആന്‍ഡേഴ്സണും സ്റ്റുവര്‍ട്ട് ബ്രോഡും ബൗളിങ്ങിലും ആതിഥേയര്‍ക്കായി തിളങ്ങി. പീറ്റേഴ്സണ്‍ മാന്‍ ഒഫ് ദ മാച്ച്.

ആന്‍ഡേഴ്സണ്‍ രണ്ടാം ഇന്നിങ്സില്‍ അഞ്ച് വിക്കറ്റ് നേട്ടത്തിനുമര്‍ഹനായി. രാഹുല്‍ ദ്രാവിഡ് നേടിയ 103 റണ്‍സാണ് ഒന്നാം ഇന്നിങ്സില്‍ ഇന്ത്യയെ രക്ഷിച്ചത്. പ്രവീണ്‍ കുമാര്‍ അഞ്ച് വിക്കറ്റ് അടക്കം ആകെ ആറ് വിക്കറ്റുകളും നേടി.

ഒന്നാം റാങ്കുകാരെന്ന വിശേഷണത്തോട് മത്സരത്തില്‍ ഒരിക്കല്‍പ്പോലും നീതിപുലര്‍ത്താനാകാതിരുന്ന ഇന്ത്യയ്ക്കായി രണ്ടാം ഇന്നിങ്സില്‍ പൊരുതിയത് 78 റണ്‍സ് നേടിയ സുരേഷ് റെയ്നയും 56 റണ്‍സ് നേടിയ വി.വി.എസ്. ലക്ഷ്മണും മാത്രം. ഒരു വിക്കറ്റ് നഷ്ടത്തില്‍ 80 റണ്‍സ് എന്ന നിലയില്‍ ഇന്നിങ്സ് പുനരാരംഭിച്ച ഇന്ത്യയുടെ വിക്കറ്റുകള്‍ നിശ്ചിത ഇടവേളകളില്‍ വീഴ്ത്താന്‍ ഇംഗ്ലണ്ടിനായി. 

ഓഹരി വിപണി ഇടിഞ്ഞു

മുംബൈ

ആര്‍ബിഐ റിപ്പോ നിരക്കുകള്‍ അരശതമാനം വര്‍ധിപ്പിച്ചതോടെ ഓഹരി വിപണി കൂപ്പുകുത്തി. സെന്‍സെക്സ് 259.23 പോയന്‍റിടിഞ്ഞ് 18612.06ലും നിഫ്റ്റി 81.25 പോയന്‍റ് താഴ്ന്നു 5599.05ലുമാണു വ്യാപാരം.

മുന്‍നിര ഓഹരികളില്‍ റിലയന്‍സ് കമ്യൂണിക്കേഷന്‍സ് 3.43%, പിഎന്‍ബി 3%, ഐഡിഎഫ്സി 2.92%, കോട്ടക് മഹീന്ദ്ര 2.18%, ഡിഎല്‍എഫ് 2.05 ശതമാനവും നഷ്ടത്തോടെയാണു വ്യാപാരം. റിയല്‍ എസ്റ്റേറ്റ്, ബാങ്കിങ് മേഖലകളാണു തകര്‍ച്ച നേരിട്ടത്

അഫ്ഗാനില്‍ തീവ്രവാദി ആക്രമണം

കാബൂള്‍

അഫ്ഗാന്‍ വിമാനത്താവളത്തില്‍ താലിബാന്‍ ആക്രമണം. കിഴക്കന്‍ പ്രവിശ്യയിലെ ജലാലബാദ് വിമാനത്താവളത്തിലാണു ഭീകരാക്രമണം ഉണ്ടായത്.

ആയുധധാരികളായ തീവ്രവാദികള്‍ വിമാനത്താവളത്തിന്‍റെ പ്രധാന കവാടത്തിനു നേരെ ഗ്രനേഡ് എറിയുകയായിരുന്നു. തുടര്‍ന്നു തീവ്രവാദികളും സുരക്ഷാ ഉദ്യോഗസ്ഥരും തമ്മില്‍ മണിക്കൂറോളം ഏറ്റുമുട്ടി. ആളപായം റിപ്പോര്‍ട്ട് ചെയ്തിട്ടില്ല. കാബൂളില്‍ നിന്നു 120 കിലോമീറ്റര്‍ അകലെയാണു സംഭവം

ഭക്ഷണം ആകാശമാര്‍ഗം

മൊഗദിഷു

വരള്‍ച്ച രൂക്ഷമായ സൊമാലിയയില്‍ ആകാശമാര്‍ഗം ഭക്ഷണം എത്തിക്കും. ഐക്യരാഷ്ട്ര സഭ റോമില്‍ വിളിച്ച അടിയന്തര യോഗത്തിലാണു തീരുമാനം. ഐക്യരാഷ്ട്ര സഭയുടെ ഫുഡ് ആന്‍ഡ് അഗ്രികള്‍ച്ചര്‍ ഓര്‍ഗനൈസേഷന്‍റെ ആഭിമുഖ്യത്തിലാണു അടിയന്തര യോഗം വിളിച്ചത്. വരള്‍ച്ച നേരിടാന്‍ ഐക്യരാഷ്ട്ര സഭ വേണ്ട നടപടി സ്വീകരിക്കുന്നില്ലെന്ന വിമര്‍ശനത്തിന്‍റെ പശ്ചാത്തലത്തിലാണു യോഗം. വരള്‍ച്ച ബാധിച്ച രാജ്യങ്ങള്‍ക്ക് സഹായം നല്‍കാന്‍ അംഗരാജ്യങ്ങളോട് ഐക്യരാഷ്ട്ര സഭ ആവശ്യപ്പെട്ടു. ലോകത്തെ ബാധിച്ച ഏറ്റവും വലിയ ദുരന്തമാണ് ഇതെന്ന് എഫ്എഒ ഡയറക്റ്റര്‍ ജാക്വിസ് ഡിയോസ് പറഞ്ഞു. സഹായം ലഭിച്ചില്ലെങ്കില്‍ ലക്ഷക്കണക്കിന് ആളുകള്‍ പട്ടിണി കിടന്നു മരിക്കുമെന്നു സൊമാലിയന്‍ ഉപപ്രധാനമന്ത്രി മുഹമ്മദ് ഇബ്രാഹിം യോഗത്തില്‍ പറഞ്ഞു.

ശിവരാജ് പുതിയ ലോകായുക്ത

ബംഗളൂരു
കര്‍ണാടകയിലെ പുതിയ ലോകായുക്തയായി സുപ്രീംകോടതി മുന്‍ ജഡ്ജി ജസ്റ്റിസ് ശിവരാജ് വി പാട്ടീലിനെ നിയമിച്ചു. ഇതു സംബന്ധിച്ച ഉത്തരവില്‍ ഗവര്‍ണര്‍ എച്ച്. ആര്‍. ഭരദ്വാജ് ഒപ്പിട്ടു. സന്തോഷ് ഹെഗ്ഡെയുടെ കാലാവധി അവസാനിക്കുന്ന പശ്ചാത്തലത്തിലാണിത്.

71കാരനായ പാട്ടീല്‍ രാജസ്ഥാന്‍ ഹൈക്കോടതി ചീഫ് ജസ്റ്റിസ്, ദേശീയ മനുഷ്യാവകാശ കമ്മിഷന്‍ ആക്റ്റിങ് ചെയര്‍മാന്‍ എന്നീ പദവികള്‍ വഹിച്ചിട്ടുണ്ട്. 2001-2009 കാലത്തെ സ്പെക്ട്രം ഇടപാടിനെക്കുറിച്ച് അന്വേഷിക്കാന്‍ കേന്ദ്രസര്‍ക്കാര്‍ നിയോഗിച്ച ഏകാംഗ അന്വേഷണ സമിതിയംഗമായിരുന്നു.

ഓഗസ്റ്റ് രണ്ടിനാണു ഹെഗ്ഡെയുടെ കാലാവധി അവസാനിക്കുന്നത്. മുഖ്യമന്ത്രി ബി.എസ്. യെദിയൂരപ്പക്കെതിരെയുളള ഖനന റിപ്പോര്‍ട്ട് സമര്‍പ്പിച്ചുകൊണ്ടാണു ഹെഗ്ഡെ സ്ഥാനം ഒഴിയുന്നത്.

സര്‍വകക്ഷിയോഗം വിളിക്കും

ന്യൂഡല്‍ഹി

കശ്മീര്‍ പ്രശ്നം പരിഹാരം പഠിക്കാന്‍ നിയോഗിച്ച കമ്മിറ്റിയുടെ റിപ്പോര്‍ട്ട് ലഭിച്ചാലുടന്‍ വിഷയം ചര്‍ച്ച ചെയ്യാന്‍ സര്‍വകക്ഷിയോഗം വിളിക്കുമെന്ന് ആഭ്യന്ത്രമന്ത്രി പി. ചിദംബരം. കശ്മീര്‍ താഴ് വരയില്‍ സംഘര്‍ഷം രൂക്ഷമായതിനെ തുടര്‍ന്നു കഴിഞ്ഞ സെപ്റ്റംബറിലാണു സമിതിയെ നിയോഗിച്ചത്. ഒന്നരമാസം മുമ്പ് ഇടക്കാല റിപ്പോര്‍ട്ട് സമര്‍പ്പിച്ചിരുന്നു.

മുതിര്‍ന്ന മാധ്യമപ്രവര്‍ത്തകന്‍ ദിലീപ് പഡ്ഗോണ്‍കര്‍, അക്കാദമിക് രംഗത്തെ പ്രമുഖ രാധാകുമാര്‍, മുന്‍ വ ിവരാവകാശ കമ്മിഷണര്‍ എം.എ. അന്‍സാരി എന്നീ മൂന്നംഗ സംഘത്തെയാണു നിയോഗിച്ചിരിക്കുന്നത്. കശ്മീരിലെ 50,000ത്തോളം ജനങ്ങള്‍, നയതന്ത്രജ്ഞര്‍, പാര്‍ട്ടി നേതാക്കള്‍, വിഘടന നേതാക്കള്‍, മാധ്യമ പ്രവര്‍ത്തകര്‍, സാമൂഹ്യപ്രവര്‍ത്തകര്‍ തുടങ്ങി എല്ലാ വിഭാഗത്തെയും നേരില്‍ക്കണ്ടാണു റിപ്പോര്‍ട്ട് തയാറാക്കിയിരിക്കുന്നത്.

അസീസിനെതിരേ CBI അന്വേഷണം

അലിഗഡ്

അലിഗഡ് മുസ് ലിം സര്‍വകലാശാല വൈസ് ചാന്‍സലര്‍ ഡോ.പി.കെ. അബ്ദുള്‍ അസീസിനെതിരെയുളള സാമ്പത്തിക ക്രമക്കേടു സിബിഐ അന്വേഷിക്കുമെന്നു സര്‍വകലാശാല അധികൃതര്‍. അന്വേഷണത്തിനു 48 ഫയലുകള്‍ ഹാജരാക്കാന്‍ മാനവശേഷി വികസന മന്ത്രാലയം ആവശ്യപ്പെട്ടതായി രജിസ്ട്രാര്‍ വി.കെ. അബ്ദുല്‍ ജലീല്‍ പറഞ്ഞു.

അതേസമയം അസീസ് വിസി സ്ഥാനം രാജിവച്ച് അന്വേഷണത്തെ നേരിടണമെന്നു സര്‍വകലാശാല ടീച്ചേഴ്സ് അസോസിയേഷന്‍ ആവശ്യപ്പെട്ടു.

നേപ്പാള്‍ സ്വദേശി അറസ്റ്റില്‍

കാഠ്മണ്ഡു

ജൂലൈ 13നുണ്ടായ മുംബൈ സ്ഫോടനങ്ങളുമായി ബന്ധപ്പെട്ടു നേപ്പാള്‍ സ്വദേശിയെ അറസ്റ്റ് ചെയ്തു. മുഹമ്മദ് സാഹിര്‍ എന്നയാളെയാണു നേപ്പാള്‍ പൊലീസ് അറസ്റ്റ് ചെയ്തത്. കഴിഞ്ഞയാഴ്ചയാണ് ഇയാളുടെ അറസ്റ്റ് രേപ്പെടുത്തിയത്. എന്നാല്‍ ഇക്കാര്യം പുറത്തുവിട്ടിരുന്നില്ല.

മുംബൈ സ്ഫോടനവുമായി ബന്ധപ്പെട്ട് ഇയാള്‍ ചില ഫോണ്‍ സംഭാഷണങ്ങള്‍ നടത്തിയെന്നും എസ്എംഎസ് അയച്ചതായും കണ്ടെത്തി. പ്രധാനമന്ത്രിയുടെ ഔദ്യോഗിക വസതിക്കു സമീപം വാടകയ്ക്കെടുത്ത അപ്പാര്‍ട്ട്മെന്‍റിലാണ് ഇയാള്‍ താമസിച്ചിരുന്നത്.

സവേരി ബാര്‍, ഓപ്പറ ഹൗസ്, ദാദര്‍ വെസ്റ്റ് എന്നിവിടങ്ങളിലുണ്ടായ സ്ഫോടന പരമ്പരകളില്‍ 25 പേരാണു മരിച്ചത്.

പ്രധാനമന്ത്രി രാജി വയ്ക്കണം

ബംഗളൂരു

2ജി സ്പെക്ട്രം ഇടപാടുകളുമായി ബന്ധപ്പെട്ട മുന്‍ ടെലികോം മന്ത്രി എ. രാജയുടെ വെളിപ്പെടുത്തലുകളുടെ പശ്ചാത്തലത്തില്‍ പ്രധാനമന്ത്രി രാജി വയ്ക്കണമെന്നു കര്‍ണാടക മുഖ്യമന്ത്രി ബി.എസ്. യെദിയൂരപ്പ. ആഭ്യന്തര മന്ത്രി പി. ചിദംബരവും രാജി വയ്ക്കണം. ഇരുവര്‍ക്കും പദവികളില്‍ തുടരാന്‍ അര്‍ഹതയില്ലെന്നും അദ്ദേഹം പറഞ്ഞു.

കര്‍ണാടകയിലെ അനധികൃത ഖനനവുമായി ബന്ധപ്പെട്ടു മുഖ്യമന്ത്രി സ്ഥാനം അനിശ്ചിതാവസ്ഥയിലിരിക്കെയാണു യെദിയൂരപ്പയുടെ പ്രതികരണം.

ഉന്നത ഉദ്യോഗസ്ഥര്‍ക്കു പങ്കില്ല

കൊച്ചി

സമ്പത്ത് കസ്റ്റഡി മരണക്കേസില്‍ ഉന്നത ഉദ്യോഗസ്ഥര്‍ക്കെതിരേ തെളിവില്ലെന്നു സിബിഐ. കേസില്‍ അന്വേഷണം തുടരുകയാണ്. ഉന്നത ഉദ്യോഗസ്ഥര്‍ക്കെതിരെയുളള സാക്ഷിമൊഴികളില്‍ സംശയമുണ്ട്. എറണാകുളം സെഷന്‍സ് കോടതിയില്‍ നല്‍കിയ സത്യവാങ്മൂലത്തിലാണ് സിബിഐ ഇക്കാര്യമറിയിച്ചത്.

പീഡനം നടന്ന സ്ഥലത്ത് എഡിജിപി മുഹമ്മദ് യാസിന്‍ എത്തിയതിനു വിശ്വനീയമായ സാക്ഷികളില്ല. കേസില്‍ സാക്ഷികളായ കനകരാജിന്‍റെയും മണികണ്ഠന്‍റെയും മൊഴികള്‍ വിശ്വാസത്തിലെടുക്കാന്‍ കഴിയില്ലെന്നും സിബിഐ ചൂണ്ടിക്കാട്ടി.

ഉന്നത ഉദ്യോഗസ്ഥരെ അറസ്റ്റ് ചെയ്യാത്ത സിബിഐ ഇരട്ടത്താപ്പു നയം സ്വീകരിക്കുകയാണെന്നു ജഡ്ജി ബി. കെമാല്‍പാഷ വിമര്‍ശിച്ചിരുന്നു. ഇതേത്തുടര്‍ന്നാണു സിബിഐയുടെ വിശദീകരണം.

നേരത്തേ കേസില്‍ എഡിജിപി മുഹമ്മദ് യാസിന്‍, ഡിഐജി വിജയ് താക്കറെ, സിഐ വിപിന്‍ ദാസ് എന്നിവരെ സിബിഐ പ്രതി ചേര്‍ത്തു ജാമ്യമില്ലാ വോറന്‍റ് നേടിയിരുന്നു.

ബസ് ചാര്‍ജ് കൂടും

തിരുവനന്തപുരം

സംസ്ഥാനത്തു ബസ് ചാര്‍ജ് നിരക്കു വര്‍ധിക്കും. ഇതു സംബന്ധിച്ച വിദഗ്ധ സമിതി ശുപാര്‍ശ മന്ത്രിസഭ അംഗീകരിച്ചു. നാളെ ഗതാഗതമന്ത്രി ബസ് ഉടമകളുമായി ചര്‍ച്ച നടത്തിയ ശേഷം അന്തിമ തീരുമാനമുണ്ടാകും.

ഓര്‍ഡിനറി ബസിന്‍റെ മിനിമം ചാര്‍ജ് നാലു രൂപയില്‍ നിന്ന് അഞ്ചു രൂപയും ഫാസ്റ്റിന് അഞ്ചു രൂപയില്‍ നിന്ന് ഏഴു രൂപയും ആകും. മിനിമം ചാര്‍ജിന്‍റെ യാത്രാപരിധി രണ്ടര കിലോമീറ്ററില്‍ നിന്ന് അഞ്ചു കിലോമീറ്ററാക്കും. വിദ്യാര്‍ഥികളുടെ കണ്‍സഷന്‍ നിരക്കിന്‍റെ കാര്യത്തില്‍ തീരുമാനമായില്ല.

മിനിമം ചാര്‍ജ് അഞ്ചു രൂപയില്‍ നിന്നും വര്‍ധിപ്പിക്കണമെന്ന ആവശ്യമാണു ബസ് ഉടമകള്‍ ഇപ്പോള്‍ ഉന്നയിക്കുന്നത്. വിദഗ്ധ സമിതി റിപ്പോര്‍ട്ട് തയാറാക്കിയ ശേഷം പലതവണ ഇന്ധനവില വര്‍ധിപ്പിച്ച സാഹചര്യം ചൂണ്ടിക്കാട്ടിയാണിത്. വിദ്യാര്‍ഥികളുടെ കണ്‍സഷന്‍ നിരക്കു കൂട്ടണമെന്ന കാര്യത്തില്‍ പിന്നോട്ടില്ലെന്നും അവര്‍ വ്യക്തമാക്കി.

റിപ്പോ നിരക്കുകള്‍ ഉയര്‍ത്തി

ന്യൂഡല്‍ഹി

റിസര്‍വ് ബാങ്കിന്‍റെ വായ്പാ നയം പ്രഖ്യാപിച്ചു. പണപ്പെരുപ്പം നിയന്ത്രിക്കുന്നതിന്‍റെ ഭാഗമായി റിപ്പോ റിവേഴ്സ്, റിപ്പോ നിരക്കുകള്‍ അരശതമാനം വീതം ഉയര്‍ത്തി. ഇതോടെ റിപ്പോ നിരക്ക് എട്ടു ശതമാനവും റിവേഴ്സ് റിപ്പോ നിരക്ക് ഏഴു ശതമാനവുമാകും.

ഒന്നര വര്‍ഷത്തിനിടെ പതിനൊന്നാം തവണയാണ് ആര്‍ബിഐ നിരക്കുകള്‍ ഉയര്‍ത്തുന്നത്. റിപ്പോ നിരക്ക് 2008 നബംബറിനു ശേഷമുളള ഏറ്റവും ഉയര്‍ന്ന നിലയിലാണിപ്പോള്‍. റിവേഴ്സ് റിപ്പോ നിരക്കാകട്ടെ കഴിഞ്ഞ അഞ്ചു വര്‍ഷത്തിനിടെ ഉയരത്തിലും.

അടിക്കടി നിരക്ക് ഉയര്‍ത്തുന്നതു സാമ്പത്തിക വളര്‍ച്ചയെ ബാധിക്കുമെന്നും ഇത്തവണ വര്‍ധന ഒഴിവാക്കണമെന്നും ബാങ്ക് മേധാവികള്‍ ആര്‍ബിഐ അധികൃതരോട് ആവശ്യപ്പെട്ടിരുന്നു. എന്നാല്‍ നിരക്ക് വര്‍ധിപ്പിച്ചാലേ പണപ്പെരുപ്പം നിയന്ത്രിക്കാന്‍ കഴിയൂവെന്ന ധനമന്ത്രാലത്തിന്‍റെ നിലപാടിനോടു യോജിക്കുകയായിരുന്നു ആര്‍ബിഐ.

നിരക്കുകള്‍ ഉയര്‍ത്തിയതോടെ വായ്പാഭാരം കൂടും. ഭവന, വാഹന, വ്യക്തിഗത വായ്പകളുടെ പലിശനിരക്ക് ബാങ്കുകള്‍ വര്‍ധിപ്പിക്കും.

ഡോക്റ്റര്‍ സമരം നിര്‍ഭാഗ്യകരം

തിരുവനന്തപുരം
സര്‍ക്കാര്‍ ഡോക്റ്റര്‍മാര്‍ സമരം പ്രഖ്യാപിച്ചതു നിര്‍ഭാഗ്യകരമെന്നു മുഖ്യമന്ത്രി ഉമ്മന്‍ചാണ്ടി. സമരം പ്രഖ്യാപിച്ചത് ഏതു സാഹചര്യത്തിലെന്നു കെജിഎംഒഎ വ്യക്തമാക്കണമെന്നും അദ്ദേഹം പറഞ്ഞു. മന്ത്രിസഭായോഗ തീരുമാനങ്ങള്‍ വിശദീകരിക്കുകയായിരുന്നു മുഖ്യമന്ത്രി.

ഞായറാഴ്ച കൊച്ചിയില്‍ കെജിഎംഒഎ ഭാരവാഹികളുമായ നടത്തിയ ചര്‍ച്ച അനുകൂല ധാരണയിലാണു പിരിഞ്ഞത്. എന്നാല്‍ പുറത്തിറങ്ങിയ സംഘടന നേതാക്കള്‍ സമരവുമായി മുന്നോട്ടു പോകുമെന്നു മാധ്യമങ്ങളെ അറിയിച്ചു. ഇത് ഏതു സാഹചര്യത്തിലെന്നു നേതാക്കള്‍ സംഘടന അംഗങ്ങളോടെങ്കിലും വ്യക്തമാക്കണമെന്നു മുഖ്യമന്ത്രി ആവശ്യപ്പെട്ടു.

സര്‍ക്കാര്‍ ചര്‍ച്ചയ്ക്കു തയാറാണ്. ഇക്കാര്യത്തില്‍ ആരോടു സംസാരിക്കുന്നതിലും സര്‍ക്കാരിനു മടിയില്ല. എന്നാല്‍ ഡോക്റ്റര്‍മാരുമായി ഇനിയും ചര്‍ച്ച നടത്തുമോയെന്ന ചോദ്യത്തിനു മുഖ്യമന്ത്രി കൃത്യ മറുപടി നല്‍കിയില്ല.

ബസ് ചാര്‍ജ് വര്‍ധന സംബന്ധിച്ച വിദഗ്ധ സമിതി റിപ്പോര്‍ട്ട് ചര്‍ച്ച ചെയ്തതായി മുഖ്യമന്ത്രി അറിയിച്ചു. മദ്യനയം സംബന്ധിച്ച് എക്സൈസ് മന്ത്രി നല്‍കിയ കരട് അംഗീകരിച്ചു. തകര്‍ന്ന റോഡുകളുടെ അറ്റകുറ്റപ്പണികള്‍ ഉടന്‍ ചെയ്യാന്‍ പൊതുമരാമത്തു മന്ത്രിക്കു നിര്‍ദേശം നല്‍കിയിട്ടുണ്ട്. ഇതിനാവശ്യമായ ഫണ്ട് മന്ത്രി ആവശ്യപ്പെടുന്നതനുസരിച്ചു നല്‍കും. ദേശീയപാത വികസനത്തിനു ഭൂമി വിട്ടുനല്‍കുന്നവര്‍ക്കുളള പാക്കേജ് സംബന്ധിച്ച പ്രശ്നങ്ങള്‍ ചര്‍ച്ച ചെയ്തു പരിഹരിക്കാന്‍ റെവന്യൂ വകുപ്പിനെ ചുമതലപ്പെടുത്തിയെന്നും മുഖ്യമന്ത്രി അറിയിച്ചു.